FENESTA VASCIA

Fenesta vascia 'e padrona crudele,

Quanta sospire mm'haje fatto jettare!

Mm'arde 'sto core comm'a 'na cannela,

Bella, quanno te sento annommenare!

Oje piglia la sperienza de la neve!

La neve è fredda e se fa maniare.

E tu comme sì tant'aspra e crudele?

Muorto mme vide e non mme vuò ajutare?

Vorria arreventare 'no picciotto,

Co 'na langella a ghire vennenn'acqua,

Pe' mme nne jì da chiste palazzuotte:

Belle ffemmene meje! Ah! Chi vò acqua?

Se vota 'na nennella da llà 'ncoppa:

"Chi è 'sto ninno ca va vennenno acqua?"

E io responno co parole accorte:

"Sò lagreme d'ammore e non è acqua!"